Дирӯз дар додгоҳи Чоршанбиев чӣ гузашт?

Додгоҳи Чоршанбе Чоршанбиев, варзишгари ҳунарҳои размӣ (боевое искусство), рӯзи 14-уми март дар боздоштгоҳе дар Душанбе идома ёфт. Ва қатъи назар аз боз будани мурофиа, ин бор ҳам ба хабарнигорон аз ҷумла хабарнигори Радиои Озодӣ, иҷозаи иштирок надоданд.

Ба гузориши Радиои Озодӣ, ширкаткунандагони мурофиа гуфтанд, миёни вакилони мудофеъ ва додситон баҳси зиёд шуд. Додситон бар асоси як навори суханронии Чоршанбиев дар бораи ҳодисаҳои Бадахшон, ӯро ба “даъват ба сарнагунии ҳокимият” муттаҳам кардааст. Вакилони мудофеъ ба бегуноҳии варзишгар пойфишорӣ доранд.

Вакилон нагуфтанд, ки чӣ пешниҳод карданд

Наҷиба Ширинбекова, як масъули Эътилофи зидди шиканҷа ва ҳамзамон аз пайвандони Чоршанбиев, баъди берун шудан аз мурофиа гуфт: “Имрӯз дар додгоҳ асосан шоҳидонро пурсиданд.”

Вай афзуд: “Вакилони мудофеъ дар ҷаласа чанд дархости муҳим пешниҳод карданд, ки барои дифоъ аз Чоршанбиев аҳамияти стратегӣ дорад. Додрас қарори ниҳоӣ қабул накард. Вале умед дорем, ки дар сурати баррасии одилонаи парванда, додгоҳ қарори дуруст қабул мекунад ва вакилон метавонанд, воқеиятро дифоъ карда, ҳаққи қонунии Чоршанбиевро таъмин кунанд.”

Вакилони мудофеи варзишгар ба Радиои Озодӣ сӯҳбат накарданд ва дақиқ нест, ки пешниҳоди онҳо аз чӣ иборат аст.

Як ширкаткунандаи дигари мурофиа ба Радиои Озодӣ гуфт, имрӯз додситон ва вакилон шоҳидони худро ба мурофиа даъват карданд. Шоҳидоне, ки аз тарафи мақомот ба додгоҳ даъват шуданд, алайҳи Чоршанбе Чоршанбиев баёнот додаанд. Шоҳидони дигар аз варзишгар пуштибонӣ кардаанд.

Гузориши видеоиро дар инҷо бинед:

Наворе, ки дардисарсоз шуд

Баҳси асосӣ дар парвандаи Чоршанбе Чоршанбиев навори суханронии ӯ дар охири моҳи ноябри соли 2021 будааст. Дар ин видео варзишгар бо забони русӣ дар бораи эътирози як гурӯҳ аз сокинони ВМКБ, пас аз кушта шудани Гулбиддин Зиёбеков, сокини ноҳияи Роштқалъа, сӯҳбат кардааст. Хабарнигори Радиои Озодӣ гуфтааст, шакли пурраи навор дар дасти ӯ нест, вале дар порчаи таҳриршудаи он Чоршанбиев гуфтааст, ки ӯ “сиёсатмадор ва ё мухолиф”-и ҳукумат нест, танҳо ба ноҳаққӣ чашм пӯшида наметавонад.

Чоршанбиев дар ин навор афзудааст: “Мо чӣ қадари дигар бояд тоқат кунем, чӣ қадари дигар чашм пӯшем? Оё ин аз рӯи адолат аст? Се рӯз аст, ки ҳодисаҳои зодгоҳамро пайгирӣ мекунам ва бароям хеле ҳайратангез аст… Мо талаб мекунем, ки ҳамаи нафарони дахлдор дар ин кор ба ҷавобгарии ҷиноятӣ кашида шаванд. Ҳамчунин онҳое ҷазо гиранд, ки муқобили эътирозгарони осоишта силоҳ гирифтанд.”

Манобеи огоҳ аз парванда мегӯянд, мақомоти тафтишотӣ ҳамин суханронии ӯро ҳамчун “даъват ба сарнагунии ҳокимият” арзёбӣ кардаанд. Ҳарчанд дар мурофиаи нахустин, ки 28-уми феврал баргузор шуд, Чоршанбиев гуфт, худро гунаҳкор намеҳисобад.

Як сиёсатшинос дар рӯзи аввали мурофиа ба ин навори суханронии Чоршанбе хулосаи манфӣ дода, гуфт, дар навори баромади Чоршанбе Чоршанбиев “даъват ба сарнагунии ҳокимият” ҷой дорад. Пештар вакилони дифои Чоршанбиев эътироз карданд, ки навори баромади варзишгарро на сиёсатшиносон, балки мутахассиси забони русӣ санҷад.

Боздошт баъди ихроҷ аз Русия

Дар назар аст, мурофиаи навбатӣ аз рӯи парвандаи Чоршанбе Чоршанбиев рӯзи 18-уми март баргузор шавад. Эҳтимол дар мурофиаи баъдӣ додситон ё айбдоркунандаи давлатӣ аз додгоҳ барои Чоршанбиев ҷазо талаб кунад.

Чоршанбиев 31-уми декабри соли гузашта аз Русия ихроҷ ва дар Душанбе боздошт шуд. Мақомот дар оғоз ӯро ба барангехтани “кинаю адовати милливу мазҳабӣ” ва “даъват ба сарнагунии ҳокимият” тавассути интернет муттаҳам карданд. Дертар иттиҳоми аввал аз парвандаи ӯ бардошта шуд. Аз рӯи иттиҳоми “даъват ба сарнагунии ҳокимият” тариқи интернет ба Чоршанбе Чоршанбиев аз 8 то 15 сол зиндон таҳдид мекунад. Ҳарчанд худи ӯ ва наздиконаш ин айбро қабул надоранд ва озодияшро мехоҳанд.

Добавить комментарий

Заполните поля или щелкните по значку, чтобы оставить свой комментарий:

Логотип WordPress.com

Для комментария используется ваша учётная запись WordPress.com. Выход /  Изменить )

Фотография Twitter

Для комментария используется ваша учётная запись Twitter. Выход /  Изменить )

Фотография Facebook

Для комментария используется ваша учётная запись Facebook. Выход /  Изменить )

Connecting to %s

Блог на WordPress.com. Тема: Baskerville 2, автор: Anders Noren.

Вверх ↑

%d такие блоггеры, как: